|
| Vesak Poya 2022 |
ලෝවැසි බෞද්ධ ජනතාවට ඉතාමත්ම වැදගත් පොහොය වන්නේ වෙසක් පොහොයයි. බෞද්ධ අපිට වෙසක් පොහොය වඩාත් වැදගත් වන්නේ ලොවට අසිරියක් ගෙන දුන් උතුම් මංගල කරුණු තුනක් වෙසක් පුන් පොහොය දවසේදී සිදුවීම නිසාය.
සිදුහත් කුමරුන්ගේ උපත, බෝසතුන් බුද්ධත්වයට පත්වීම, බුද්ධ පරිනිර්වාණය යන කරුණු තුන සැලකිල්ලට ගෙන ලෝක බෞද්ධ මහා සම්මේලනයේ යෝජනාවකට අනුව වෙසක් පුන් පොහොය දිනය සමස්ත ලෝවැසි බෞද්ධයන්ගේ දිනය වශයෙන් පිළිගනු ලැබූ අතර එක්සත් ජාතීන්ගේ මහා සමුළුවේදී වෙසක් පොහෝ දිනය සැමරීමේ දිනයක් ලෙස සම්මත කර වෙසක් පුන් පොහොය ජාත්‍යන්තර නිවාඩු දිනයක් ලෙස ද නම් කර තිබීම විශේෂත්වයකි.
සිදුහත් බෝසතුන් දීපංකර බුදුහිමියන්ගේ පාද මූලයේදී නියත විවරණ ලද්දේ ද වෙසක් පොහෝ දිනකදීය. විජය කුමරුන් ලක්බිමට ගොඩබසින ලද්දේ ද වෙසක් පොහොය දිනයකය. බුදුන් වහන්සේගේ තුන්වෙනි ලංකා ගමනය සිදුවීමත්, එම ගමනේදී සමනොළ ගිරි සිරස බුදු සිරිපා සටහන් තැබීමත් වෙසක් පුන් පොහෝ දිනයේදී සිදු වූ තවත් උතුම් සිදුවීම්ය.
බුදුන් වහන්සේගේ ධර්ම භාණ්ඩාගාරික ආනන්ද මහරහතන් වහන්සේගේ පිරිනිවන් පෑම සිදුවී ඇත්තේ ද වෙසක් පුන් පොහෝ දිනයකදීය.
දේවානම්පියතිස්ස රජතුමාගේ දෙවන රාජාභිෂේකය සිදුවූයේද මෙම පොහොය දිනයේය. මේ සියලුම කරුණු සලකා බැලීමේදී අවබෝධ වන්නේ අවුරුද්දේ පොහොය දොළහ අතර වැදගත්ම පොහොය වෙසක් පොහොය බවය.
මෙවර BrainStorm වෙසක් තොරණ 'බුද්ධ චරිතය' පාදක කරගෙන නිර්මාණය වුවකි. පහතින් නරඹන්න.
පුන් සද විලස ලෝ සත වෙන දම් දෙසමින්
පින්කද වඩී මහසග ඝණ පිරිවරමින්
පින්මද දනම් පව් පිරුවත් දොස් නගමින්
පන්හිද මදියි කිමට මුණි ගුණ වයමින්